Rahul Dravid recently said in his post retirement speech, "One should understand where he is coming from to know where he is going"
Just sharing my thoughts on similar lines...
Woh Kaun Hai??
Aaj bahut dinon baad yeh khayal aaya
Ki kuch likhne ki koshish kari jaye.
Likhne baitha toh yahi sawaal saamne aaya
Ki woh kaun hai jiski badaulat yeh yantra hai jispe main likh paa raha hoon?
Woh kaun hai jisne yeh aasan banaya jispe main baith paa raha hoon?
Woh kaun hai jiski badualat yeh ghar hai jiski chhat ke neeche mein baitha hun?
Woh kaun hai jiski badaulat yeh shehar, yeh desh hai?
Woh kaun hai jiska karishma yeh srishti, yeh vatavaran hai?
Inhi kuch sawalon ka jawab dhundhte hue main sochta hun
Ki woh kaun hai jiski badaulat main hoon?
Ki main yeh sab mehsoos kar sakta hoon, samajh sakta hoon aur phir main apne antar-mann mein jhaankkar yeh poochta hun
Ki kya mere hone se hi yeh sab kuch hai??
Tabhi mujhe mere saare sawalon ka jawab milta hai ki agar main hi nahin hoon, toh mere liye is srishti, vatavaran, ghar ka kya mol...
Mujhe banane wala hi woh hai, jiske karishme se yeh sab hai
Wahi hain jinki wajah se mera wajood hai
Aaj ka insaan apna khud ka wajood banane ki kawayad mein kahin na kahin yeh bhool jata hai ki uska wajood us din se hai, us paigambar mein hai jiski wajah se uska janam hua
Hum jab tak apne Parvardigar ko samajh nahin payenge, apna wajood hamesha khojte hi reh jayenge.
Insaan ko aaj zarurat hai toh bas pehle apne astitva ko pehchanne ki
Uske baad hi woh apna wajood ko sahi mayenon mein dhoondh payega aur apne pairon par khada ho payega
Sach hi toh kaha gaya hai "Mujhe nahin pata bhagwan hai ya nahin, aur agar hai toh un pattharon mein hai ya pedon mein hai ya nadi, neheron mein hai jinhe hum poojte hain?....sach toh yahi hai ki dharti pe roop maa-baap ka hi us vidhata ki pehchan hai"
No comments:
Post a Comment